Monday, September 29, 2014

చండీవనంలో లేడీ గజిని

  
                                               చండీవనంలో లేడీ గజిని 
12:02pm Apr 7
ఎయిర్పోర్ట్ లో దిగంగానే మొబైల్ లో స్వాగత సందేశం...
"airtel
మిమ్మల్ని చండీగర్ కు స్వాగతిస్తోంది. ఉచిత రోమింగ్ కొరకు 121 కు ROAM అన్న SMS పంపండి.
పంపాకా, ఇన్కమింగ్ ఫ్రీ అవ్వాలంటే 75 రూ. కట్టాలి అన్నారు. సరే, ఇదీ బానే ఉంది కదా, అని అంగీకార సందేశం పంపాను.

మరో రెండు కిలోమీటర్లు వెళ్ళామో లేదో... మళ్ళీ మొబైల్ కుయ్ అంది.
"airtel
మిమ్మల్ని పంజాబ్ కు స్వాగతిస్తోంది. ఉచిత రోమింగ్ కొరకు 121 కు ROAM అన్న SMS పంపండి.

ఇదేవిటండి ? అడిగాను శ్రీవారిని.
'
మరే! ఇప్పుడు మనం చండీగర్ నుంచి పంజాబ్ లో అడుగు పెట్టాము. ఇక్కడో తిరకాసు ఉంది. చండీగర్ యూనియన్ టెర్రీటరి. ఇది పంజాబ్, హర్యానా లకు రాజధాని. రెంటికీ మధ్యన ఉంది. అందుకే మనం ఇప్పుడు మూడు రాష్ట్రాల్లో ఉన్నట్లు...'

మర్నాడు మా అమ్మాయి స్కూల్ కోసం వెళ్తుంటే, మరో సందేశం...
"airtel
మిమ్మల్ని హర్యానా కు స్వాగతిస్తోంది. ఉచిత రోమింగ్ కొరకు 121 కు ROAM అన్న SMS పంపండి.

నాకు ఏడుపోక్కటే తక్కువ ! అంతేకాదు, ఇక్కడ మేము పంచకుల అనే హర్యానా కు చెందిన విభాగంలో ఉండబోతున్నాము. ఇందులోనూ సెక్టార్ లు ఉంటాయి. చండీగర్ లోనూ సెక్టార్ లు ఉంటాయి. కాబట్టి, ఫలానా సెక్టార్ లో కాఫీ పొడి దొరుకుతుంది, అని ఎవరైనా చెప్తే, చవటాయి లాగా బుర్ర ఊపెయ్యకుండా, చండీగర్ సెక్టార్ లోనా? లేక పంచకుల సెక్టార్ లోనా, అని అడగాలన్న మాట !

అనవసరంగా అంటారు గాని, ఇందుకు కాదండీ వీళ్ళకి బుర్ర తక్కువని, అంతా జోకులేస్తారు! మీరు కూడా ఇక్కడికి వస్తే, అసలు ఏ రాష్ట్రంలో ఉన్నామో తెలుసుకునేందుకే సగం మేధా శక్తి స్వాహా అవుతుంది.

త్వరలోనే లేడీ ఘజిని కాబోయే కాబోతున్నాను, కాస్కోండి! అప్పుడు 'అచ్చంగా తెలుగు' అంటే ఏ రాష్ట్రంలో ఉంది ? అని అడుగుట తధ్యం!


చండీవనంలో ఆల్సి (ఆలూ + లస్సి )

చండీవనంలో ఆల్సి  (ఆలూ + లస్సి )

భావరాజు పద్మిని
12:28pm Apr 7
నవ్వుతారేమో !

ఆలూ... లస్సి... ఇవే ఇక్కడ అంతర్జాతీయ సమస్యలు. ఒకప్పుడు ఇక్కడ జనాల అవసరాలకు సరిపడా లస్సి తయారు చేసేందుకు మిక్సీ లు చాలక వాషింగ్ మెషిన్ లు కొని, తయారు చేసేవారట! మరి మంచి మీగడ ఉన్న మజ్జిగ, పంచదార.... ఇక త్రాగిన కాయము పెరుగుట తధ్యం!

ఇక ఆలూ... అంటే, ఓ బంగాళాదుంప... నీ దుంప తెగ! నిన్ను బంగాళాఖాతంలో పడెయ్య! కాశీ లో వదిలెయ్య ! పొద్దుట లేస్తే, నలభీముల్లాంటి ఇద్దరు వంట వాళ్ళు మా వారి గెస్ట్ హౌస్ లో... ఆలూ పరాటా, ఆలూ గాజర్, ఆలూ మేతి, ఆలూ బీన్స్... ఆలూ కుర్మా... ఆలూ శాండ్విచ్... ఇలా బాదేస్తున్నారు. ఒక రోజా, రెండు రోజులా... ఇక ఆలూ చూస్తే ,వికారం పుడుతోంది. ఇక ఆలూ తింటే, ఆలూ బొండా లాగా అవుతామని మీకు తెలిసిందేగా!

అందుకే, ఈ రోజు స్త్రీ స్వేచ్చ కోసం పోరాడినట్లు, ఆలూ స్వేచ్చ కోసం పోరాడాను. నలభీముల్ని, వంటింటి బయటకు తరిమి, లేత బెండకాయలు తరిగి వేయించుకున్నాను. భీముడిని, కరివేపాకు కోసుకు రమ్మని (ఇక్కడ కరివేపాకు అమ్మరు. కనిపెట్టి, కోసుకునో, కొట్టుకునో, రావాల్సిందే!) పంపి, టమాటో పప్పు చేసాను. ఇక తినడమే తరువాయి.

అధ్యక్షా! వెంటనే ఆలూ ను బాన్ చెయ్యాలని డిమాండ్ చేస్తా ఉన్నాను. కూరల్లో నాకు నచ్చని ఒకే ఒక కూర ఆలూ...


కదంబం 3

"అచ్చంగా తెలుగు" ఫేస్ బుక్ బృందంలో అనేకమంది మిత్రులు అందించిన మంచి అంశాలు...

Shan Konduru
6:39pm Mar 7
శ్రీ బేతవోలు రామ బ్రహ్మం గారు వ్రాసిన ఈపాట తెలియని వారు ఉండరేమో.
ఇందులో కవి అమ్మవారిని, వారి ఆభరణాల అందాన్ని, భక్తుడి యొక్క భక్తీ భావనని
ఎంత అద్భుతంగా వర్ణన చేసారో, ఆవిష్కరించారో చూడండి.

శీతాద్రి శిఖరాన పగడాలు తాపించు | మా తల్లి లత్తుకకు నీరాజనం |
కెంపైన నీరాజనం || భక్తీ పెంపైన నీరాజనం ||
యో గీంద్ర హృదయాల మ్రోగేటి మాతల్లి | బాగైన అందెలకు నీరాజనం |
బంగారు నీరాజనం || భక్తి పొంగారు నీరాజనం ||
నెలకొల్పు డెందాన వలపు వీణలు మీటు | మాతల్లి గాజులకు నీరాజనం |
రాగాల నీరాజనం || భక్తి తాళాల నీరాజనం ||
మనుజాలి హృదయాల తిమిరాలు తొలగించు | మాతల్లి నవ్వులకు నీరాజనం |
ముత్యాల నీరాజనం || భక్తి నృత్యాల నీరాజనం ||
చెక్కిళ్ళ కాంతితో క్రిక్కిరిసి అలరారు | మాతల్లి ముంగెరకు నీరాజనం |
రతనాల నీరాజనం || భక్తి జతనాల నీరాజనం ||
పసి బిడ్డలను చేసి - ప్రజనెల్ల పాలించు | మాతల్లి చూపులకు నీరాజనం |
అనురాగ నీరాజనం || భక్తి కనరాగ నీరాజనం ||
పగడాలు మరపించు ఇనబింబ మనిపించు | మాతల్లి కుకుమకు నీరజం |
నిండైన నీరాజనం || భక్తి మెండైన నీరాజనం ||
తేటి పిల్లల వోలె గాలి కల్లల నాడు | మాతల్లి కురులకు నీరాజనం |
నీలాల నీరాజనం || భక్తి భావాల నీరాజనం ||
జగదేక మోహిని సర్వేశు గేహిని | మాతల్లి రూపునకు నీరాజనం |
నిలువెత్తు నీరాజనం || భక్తి నిలువెత్తు నీరాజనం ||

______________________________________________________________________

కొల్లూరు విజయా శర్మ(2014)7:30pm Apr 24

"మగడు మెచ్చిన చాన కాపురంలోనా
మొగలిపూలా గాలి ముత్యాల వాన"

ఎంత అందమైన,అద్భుతమైన భావన... అసలు ఊహించటానికే ఎంత బావుంది. ముత్యాల జల్లులలో తడుస్తూ మొగలి పూల సుగంధం మనని కమ్ముతూ... ఆరుద్ర గారు ముత్యాల ముగ్గు లో టిఅటిల్ సాంగ్ లో రాసిన చరణం. .. అసలు ఈ పాటకి మూలం జానపద సాహిత్యం లో ఉంది.

"వీధినెందరు ఉన్న వీచదే గాలి
గడప నెందరు ఉన్న కురియదే వాన
మా చిన్ని అబ్బాయి వీధి నిలుచుంటే
మొగలిపూలా గాలి ముత్యాల వాన"
అని ఒక తల్లి తన బిడ్డ గురించి మురిసిపోతూ ఉంటుంది.

ఆ మాటనే ఆరుద్ర గారు "ముత్యమంతా పసుపు"పాటలో పొదిగారు.ఎంత అందంగా పొదిగారు నాకయితే ఆరుద్ర గారు చెప్పిన మాటే నచ్చింది. అన్యోన్యత,పరస్పర స్నేహం ఉన్న జంట జీవితం లో ప్రతి క్షణం మొగలిపూల గాలి ముత్యాల వానే కదండీ .

_________________________________________________________

కొల్లూరు విజయా శర్మ8:13pm Apr 22
నెత్తిన పాలు పోశావు అంటుంటారు కదా !అవి పాలు కాదు .... "ప్రాలు " అంటే బియ్యం . అంటే ఆశీర్వచనం లాంటిది . తలంబ్రాలు లో ఉన్న ప్రాలు అదే (తలన్ +పరాలు = తలంబ్రాలు ).
Vijaya

____________________________________________________

Durga Bhamidipati6:45am Apr 22
సిరివెన్నెల సీతారామశాస్త్రి గారి జన్మదిన మాసోత్సవ సందర్భంగా...........................

బదిలీ కోసం టెలిఫోన్‌పై కవిత్వం: సిరివెన్నెల గారు పి అండ్‌ టిలో పని చేస్తున్నప్పుడు టెలిఫోనుపై కవిత్వం రాయమని పై అధికారి ఒత్తిడి చేస్తే టెలిఫోన్‌ విభాగానికి బదిలీ చేస్తాననే మాట తీసుకుని ఈ కవిత రాశారు.

దూర శ్రవణ యంత్రం
దూరాన్ని తీగతో కట్టిపడేసిన సవ్మెూహన మంత్రం
ప్రకృతి బంధనాలను తెంచేసిన వైజ్ఞానిక తంత్రం
ఆకాశానికి తంత్రులు బిగించి శ్రుతి చేసిన యంత్రం
మానవ వాణికి లోకాలోకన్నందించిన నేత్రం
విశ్వమంతట విశృంఖలముగ నర్తించె నరునిగాత్రం
విజ్ఞాన యజ్ఞ వాటికలో ఇది మానవీయ శ్రీ సూక్తం
మానవుని విజయకీర్తనలో ఇది ఆరోహణమంత్రం.

(ఆంధ్ర ప్రభ డైలీ సెప్టెంబర్ 3, 2011)

కొసమెరుపు:
'శంకరాభరణంః చిత్ర యూనిట్‌ కాకినాడ వస్తున్నప్పుడు ప్రముఖ నవలా రచయిత ఆకెళ్ళ పాటరాయమని కోరితే.. సంఘటనలు, వ్యక్తులపై పాటలు రాయనని చెప్పాను. నా ఆర్థిక పరిస్థితి అప్పట్లో బాగాలేని విషయం తెల్సిన వారు నా సమాధానం విని మొండి అని విమర్శించారు. నేను విధించుకున్న కట్టుబాటు అది. ఇప్పటికీ అంతే'.

సిరివెన్నెల ప్రస్థానం: 'ఓనాడు కె. విశ్వనాథ్‌ నుంచి వచ్చిన పిలుపందుకుని వెళ్లి కలిసా... సిరివెన్నెలకథను చెప్పి..సందర్భానుసారంగా పాటరాయమ న్నారు. విధాత తలపున ప్రభవించినది అని ప్రారంభిం చా.. అది ఆయనకు నచ్చింది. వెంటనే ఈ మాటలకు సరితూగే పూర్తి పాట ఉందని విరించినై విరచించితిని వినిపించా.. అద్భుతంగా ఉందన్నారు. అసలు విషయం అప్పుడే చెప్పా.. గతంలోనే ఈ పాట పంపానని, వినియోగించ లేదని. కె. విశ్వనాథ్‌ దాన్ని సరి చూసుకుని.. నాతో సమ్మతించారు.ఆపాట ఆయనకి ఎంతో సంతృప్తినివ్వడంతో సిరివెన్నెలఃలో పాటలన్ని నన్నే రాయమన్నారు. దీంతో ఇక వెనుతిరిగి చూడలేదన్న విషయం అందరికీ తెలిసిందే'!
-సీతారామశాస్త్రి

_________________________________________________________

కొల్లూరు విజయా శర్మ5:57am Apr 11
శీత వేళ రానీయకు శిశిరానికి చోటీయకు
ఎదలోపలి పూలకారు-ఏనాటికి పోనీయకు
ఉదయాన కలత నిదర చెదరిపోవు వేళ
మబ్బులలో ప్రతి మాయమయేవేళ
ముసలితనపుటదుగుల సడి ముంగిటవినబడేనా
వీటలేదని చెప్పించు వీలు కాదని పంపించు.

కృష్ణ శాస్త్రి

ఎంత చక్కని భావన..వయసు కాదు మనసు ప్రధానం.నిత్య యవ్వనం మనసులో ఉంటే అది మన జీవితం లో అను నిత్యం తొణికిసలాడుతుందింఅనసులో ఎప్పుడు వసంతం వెల్లివిరియాలి.కలల రెక్కలని రాల్చేసే శిశిరాన్ని మనసులోకి,జీవితం లోకీ రానివ్వకూడదు. అసలు అయిన భావన ఎవరికైనా అంతకు ముందు కలిగిందా?ముసలి తనపు అడుగుల చప్పుడు వినిపిస్తే అబ్బెబ్బే లేదు లేదు,రాడు రాడు అని చెప్పాలట. మనసుని ఉల్లాసంగా ప్రశాంతంగా ఉంచుకోగలిగితే,నిత్య యవ్వనం జీవితం లో ఆరు ఋతువులలో ఆమని నే విరబూస్తుంది. అలా అని కవి కి మరణం అంటే భయమా?కానే కాదు.. మరణాన్ని ప్రియుడు పంపిన" ప్రణయ పల్లకీ"అంటారాయన. 

_________________________________________________________

Kalyani Gauri Kasibhatla9:14pm Apr 10
కొన్నిమాటలు.......

''స్త్రీ'' ఒక అమూల్య వరం పురుషుడికి.. తన ప్రేమకు అభ్యంతర కరమైన నీతి మీద
ఆమెకు గౌరవం తక్కువ..అప్పుడే సాధారణంగా ఉదారులైన సత్పురుషులకు ,వారు ప్రేమించే స్త్రీలకూ ఘర్షణ..... చలం

స్వార్ధ ప్రేమ అడుగు లేని పాత్ర వంటిది... ఎన్ని సరస్సులనైనా దానిలో వొంపవచ్చ్చు..కానీ అది ఎప్పుడూ అంచుల వరకు నిండదు... హోమ్స్

అవును ,కాదు అనే మాటలు చాలా పాతవి..చాల చిన్నవి.. అయినా వాటిని చెప్పడానికి ఎంతో ఆలోచన అవసరం... పైధాగరస్

స్నేహం ఎప్పుడూ ప్రతిఫలాపేక్ష లేని ఆపేక్షతో నిండి ఉండాలి

తృప్తి కీ అసంతృప్తి కీ మధ్య తేడాయే అగాధం లా నిలిచి జీవితాన్ని దుఃఖ మయం చేస్తుంది

మగవాడి ఇష్టం వేరు,,ప్రేమ వేరు,,స్త్రీ కి రెండూ ఒకటే

ఏ ఒక వ్యక్తి నుండో మనకు కావాలనుకున్నది పొందాలనుకోవడం..అలా జరగని నాడు ఇక జీవితమే లేదనుకోవడం..అర్ధ రహితం... అవివేకం......

_________________________________________________________

J K Mohana Rao6:24am Apr 9
శ్రీరామనవమి సందర్భముగా ఒక క్రొత్త సార్థకనామ వృత్తము, పేరు రామస్వర. క్రింద రెండు ఉదాహరణములు -

రామస్వర - ర/ర/మ/స/య/లగ, యతి (1, 9) UIU UIU UU - UII UIU UIU
17 అత్యష్టి 38419

రామునిన్ దల్చగా నిండున్ - రాగము డెందమం దెప్పుడున్
రామునిన్ బిల్వగా నిండున్ - రాగము గొంతులో నెప్పుడున్
ప్రేమ రామస్వరమ్మేగా - ప్రీతికిఁ బేరు యా రాముఁడే
రాముఁడే జీవిత మ్మీ నా - ప్రాణపు పేరు యా రాముఁడే

సుందరమ్మౌ వనిన్ రామా - చూడగ లేను నీవెక్కడో
వందలౌ నీలమేఘమ్ముల్ - వారిదదేహ నీవెక్కడో
రామచిల్కల్ రమించెన్గా - రాముని సుస్వర మ్మెక్కడో
ముందురా చిందుచున్ నవ్వుల్ - మోహనరామ వేగమ్ముగా

_________________________________________________________

Kalyani Gauri Kasibhatla5:43pm Apr 6

పాత డైరీలో రాసుకున్న వివిధ రచయితల భావాలు..

రోజూ ఓ గ్లాసుడు నీళ్ళు పోస్తే ...ప్రతి రోజూ దోసెడు పువ్వుల్నిస్తుంది..మల్లె తీగ.
చిన్న ఆధారం చూపిస్తే గాఢo గా అల్లుకుపోతుంది.. మనీ ప్లాంటు..
తాను ఎండిపోయాక కూడా గదినంతా పరిమళం..తో నింపుతుంది..సంపెంగ..
ఈ,పరిమళాలు ,ఈ బంధాలూ..అన్ని తాత్కాలికమే..

కానీ ఒక స్త్రీ తో పోలిస్తే ఇవన్నీ..యే పాటి?

రవ్వంత ఆప్యాయత చూపించి ,కాసింత సెక్యూరిటీ చూపిస్తే, నీకు నేనున్నాను అన్న భావం కలిగిస్తే.. మల్లెకన్నా ఎక్కువగా ప్రేమ పరిమళాన్నిస్తూ,తీవెకన్నా గాఢo గా జీవితాన్ని అల్లుకుపోదూ?..
ఇంత చిన్న విషయాన్ని పురుషుడెప్పుడు తెలుసు కుంటాడు???

నేనొక నాదాన్ని..మీటితే నీకు జీవిత స్వరగతులు వినిపిస్తాను..
నేనొక స్వేదాన్ని.నన్ను గుర్తించు..నీకు జీవితాంతం సేవ చేస్తాను..
నేనొక భావాన్ని..నన్ను అర్ధం చేసుకో..నీ గుండెల్లో ఉంటాను..
నేనొక వేదాన్ని... నన్ను చదువు..నీకు జీవిత పరమార్ధం తెలుస్తుంది..

ఎక్కడ ప్రేమ ఉంటుందో..అక్కడ దుఃఖం ఉంటుంది..
ప్రేమ దుఃఖాన్ని తక్కువ చేయదు... ఎక్కువ చేస్తుంది..
అందుకే ఈ దుఃఖం..ఎప్పుడయితే ఈ దుఃఖం తగ్గిపోతుందో..
అప్పుడు ప్రేమ తగ్గిపోయిందని అర్ధం....

_________________________________________________________

Rama Krishna Choudarapu10:56am Apr 7
ఒక తెలుగు భాషాభిమాని, ఆంగ్లమాధ్యమంలో చదువుకున్న తన మిత్రున్ని, నీకు 'ఆత్మగౌరవం', 'ఆత్మవిమర్శ', 'ఆత్మాభిమానం' అంటే తెలుసా అని అడిగిండట...

అప్పుడు ఆ మిత్రుడు ఆ పదాలకిచ్చిన నిర్వచనాలుః

'ఆత్మగౌరవం' అంటే ఆత్మలను గౌరవించడం, 'ఆత్మవిమర్శ' అంటే ఆత్మలు లేవు అని వాటిని విమర్శించడం, 'ఆత్మాభిమానం' అంటే రాంగోపాల్ వర్మలాగ ఆత్మలను అభిమానించడం!!!

ఇది విన్న భాషాభిమాని, ఇంక నా వల్లకాదు రా, నేను 'ఆత్మహత్య' చేసుకుంటానంటే, అతని మిత్రుడు పగలబడి నవ్వి, 'చాల్లేరా జోకులు... చచ్చిపోయిన తర్వాతనే కదా ఆత్మలయ్యేది, ఆత్మలను ఎవరయినా ఎట్లా హత్య చెయ్యగలరు' అన్నాడట!

(పొద్దున్నే, ఎఫ్ఫెం రెయిన్ బో లో విన్నది...)

చండీవనంలో ఇళ్ళ వేట

చండీవనంలో ఇళ్ళ వేట 
 
12:46pm Apr 11
అవాక్కవుతారా ?

ఓ నాల్రోజుల క్రితం ఇళ్ళ వేటలో ఉన్నాము. వేంకటేశ్వర స్వామి గుడికి వెళ్తుంటే, ఒక ఇల్లు కనబడింది. ఇల్లు అద్దెకు ఆర్మీ/ గవర్నమెంట్/ ఎం.ఎన్. సి. ... వాళ్లకు మాత్రమే! వివరాలకు సాయంత్రం 5.30 తర్వాత 'తల్వార్' ను సంప్రదించండి... అని ఉంది. ఆహా, కత్తి లాంటి పేరు, అనుకుంటూ చుట్టూ చూసాము. ముందు కరివేప చెట్టు, అశోక వృక్షం(అలిగినప్పుడు, జుట్టు విరబోసుకున్నప్పుడు సీతమ్మవారిలా కూర్చోడానికి బాగుంటుంది), ఇంకా మందార, ఇతర మొక్కలు. ఒక్కటే అంతస్తు, 3 బెడ్ రూములు, పెరడు, పైన డాబా ఇల్లు. బయటికి అంతా బాగుంది. కత్తి మాష్టారు కు ఫోన్ చేస్తే, సాయంత్రం వస్తానని చెప్పారు.

సాయంత్రం ఆయన వచ్చే లోపు పక్కింటి శర్మ గారు పలకరిస్తున్నారు. 'అమ్మాయ్... నువ్వు మెళ్ళో ఆ బంగారపు గొలుసు తీసెయ్యి. ఇక్కడ మొగుడూ పెళ్ళాలు వాకింగ్ కు వెళ్తుంటే కూడా, కత్తితో పొడిచి, బంగారం లాక్కు పోతారు. నేను చెప్తుంటే నా కోడలు, కూతురూ కూడా వినరనుకో !' అన్నాడు.

'
అలాగా !' అంటుండగా తల్వార్ గారు వచ్చారు. 
'
అయ్యా! ఇక్కడ డాబా ఇళ్ళలో భయాలు ఎక్కువా?'
'
అరె, మొత్తం ప్రపంచం ఇక్కడ ఉంటోంది. మీ ఒక్కళ్ళకి భయం ఏమిటండీ, భలే వారే, ధైర్యం ఉండాలి.!', రండి, ఇల్లు చూపిస్తా... అంటూ తీసుకెళ్ళాడు.

ఇల్లంతా పాలరాయి ఫ్లోరింగ్, విశాలంగా ఉంది. కాస్త శుభ్రం చెయ్యాలి అంతే. నాకు డాబా ఇళ్ళ సరదా. వెన్నెల, ప్రకృతి, అన్నీ ఉంటాయని. అయితే, ఇంట్లో ఫ్యాన్లు, లైట్లు లేవు. 
'
ఫ్యాన్లు అవీ పెట్టించి ఇస్తారా?'
'
అడగాలి, అయినా ఫ్యాన్లు అవీ పెట్టించినా మీరు వచ్చే ముందు పెట్టిస్తా! ఈ లోపు ఎవడైనా వచ్చి పీక్కు పొతే కష్టం కదా !'
'
అంటే ఎవరైనా దొంగతనాలకు వస్తారా? '
'
చూడండీ, ఇవాళ రేపు భారతావనిలో భద్రత ఎక్కడా లేదు. ఫ్లాట్స్ లో రిస్క్ లేదంటారా? ఎక్కడైనా ఉంది. ధైర్యం ఉండాలి ....'

మీరు ఊరికే భయపడుతున్నారు. వెనుక గోడ చూసారా యెంత ఎత్తుగా పెట్టించానో, ఇక మీరు తలుపులు తీసుకు పెట్టుకుంటే, ఎవరొచ్చినా ఏమీ చెయ్యలేము. మా ఆవిడ ఒక్కతే ఉండట్లా! రండి, పరిచయం చేస్తాను, అంటూ తీసుకెళ్ళాడు.
దార్లో నీళ్ళు పారుతున్నాయి. చూడండి, ఎదురిల్లు ఖాళీగా ఉందా, దొంగాలోచ్చి, మంచి నీళ్ళ మీటర్ పీక్కు పోయారు. మా ఇంట్లో బయట ఉన్న ఇత్తడి పంపు కూడా పీక్కు పొతే, ఇదిగో, అరవై రూపాయలెట్టి, ప్లాస్టిక్ పంపు పెట్టించా... ఏమైనా ఇది సేఫ్ సిటీ అండి. ఇక్కడ ఉండడానికి ధైర్యం ఉండాలండి....

మరే, దొంగలు కూడా మాంచి ధైర్యంగా పట్టుకు పోయారు, అనుకుంటూ మా వారి వంక చూసాను. ఆయన కూడా నవ్వుతున్నారు.

'
మరైతే ఇల్లు ఇస్తే ఎప్పుడు వస్తారు?' అడిగారు కత్తి కాంతారావు గారు.

'
వచ్చే నెల 15 తర్వాతండి. మా నాన్న గారి సంవత్సరీకాలు ఉన్నాయి. అవయ్యకా వస్తాము. కావలిస్తే, మే 1 నుంచి అద్దె ఇస్తాము. '

'
అవునా ! అలాగైతే ఎలాగండి ? ఇల్లు ఖాళీగా ఉంటే ఎవరైనా లోపలి తలుపులూ, కిటికీలు పీక్కు పోరూ... మీ ఆఫీస్ కుర్రాళ్ళని పడుకోబెట్ట రాదూ !'

అవాక్కయ్యి, వాక్కు మూగబోయి, ఉన్నాము ఇద్దరం.

'
అంటే... ఊరు వెళ్ళినప్పుడు ఇల్లు తాళం పెడితే ఇబ్బందే కదండీ!'

'
ఏవిటండి, మీ ఫ్లాట్స్ లో ఉండే వాళ్ళతో ఇదే ఇబ్బంది, అన్నిటికీ భయపడి చస్తారు. ధైర్యం ఉండాలండీ!'

'
మొండి గోడలకు కొండ ముచ్చుల్ని కాపలా పెట్టు ! తుప్పు పట్టిన కత్తి మొహమూ నువ్వూనూ...' మనసులో తిట్టుకున్నాను నేను....

'
అలాగేనండి, బాగా ధైర్యంగా ఆలోచించి, చెప్తాము,' అంటూ లేచారు మా వారు. బ్రతికుంటే బలుసాకు తినొచ్చని, కత్తి బాబుకి, ఖాళీ ఇంటి మీద ఉన్న మమకారం, మనుషుల ప్రాణాల మీద లేదులా ఉంది. ఎందుకొచ్చిన రిస్క్, ఊరుకాని ఊళ్ళో ఫ్లాట్స్ లో ఉండడమే నయం...' అనుకుంటూ బయటపడ్డాము ఇద్దరం.

కత్తి యుద్ధాలు, మల్ల యుద్ధాలు తెలిసిన ఎవరైనా 'సేఫ్ సిటీ' లో డాబా ఇల్లు అద్దెకు తీసుకుని, ధైర్యంగా ఉండచ్చు. మరి ధైర్యం చెప్తూ భయపెట్టే వీళ్ళతో అవాక్కయ్యేందుకు సిద్ధమేనా?



'ఋణానుబంధ రూపేణ...'

 'ఋణానుబంధ రూపేణ...
భావరాజు పద్మిని 

నా జీవితంలో జరిగిన ఒక వాస్తవ సంఘటన రాస్తున్నాను. 'ఋణానుబంధ రూపేణ...అంటారు కదా ! ఈ సామెతను తలచుకున్నప్పుడల్లా నాకెందుకో ఆ ముసలమ్మే గుర్తుకు వస్తుంది.


అప్పట్లో మేము విజయవాడ లో ఉండేవాళ్ళం. మా ఇల్లు వినాయక థియేటర్ ఎదురు సర్వీస్ రోడ్డు ప్రక్కనే ఉండేది. రోజూ పెద్ద పాపను ఆటో ఎక్కించేందుకు క్రిందికి రావటం అలవాటు. అలా ఆ రోజు ఆటో ఎక్కించి వెళ్తుంటే, గేటు వద్ద ఉన్న మెట్ల ప్రక్కన ఓ ముసలమ్మ కనిపించింది. మాంచి వేసవి కాలం... ఎండ... దాహం, దాహం అంటోంది. 

ఆమె వంక చూసాను. చిరిగిన, మాసిన దుస్తులు, ఎప్పుడు స్నానం చేసిందో తెలీదు. కనీసం కదలలేక పోతోంది. అంతా దూరం నుంచి చూసి వెళ్ళిపోతూ ఉన్నారు. నా మనసు ఊరుకోలేదు. నా తల్లిదండ్రులు నాకు మనిషిని మనిషిగా చూడడం మాత్రమే నేర్పారు. కులం, మతం, వేషభాషలు చూసి మర్యాద ఇవ్వడం నాకు తెలీదు. అందుకే, వెంటనే పైకి వెళ్లి, నీళ్ళు తెచ్చి ఇచ్చాను. నేను లేవలేను, నోట్లో పోయ్యమన్నట్టు సైగ చేసింది. దగ్గరకు వెళ్లి నెమ్మదిగా తల ఎత్తి, నోట్లో నీళ్ళు పోసాను. కృతజ్ఞతతో ఆమె కళ్ళు మెరుస్తున్నాయి.

'అమ్మా, మూడు రోజులైంది అన్నం తిని, ఏమన్నా పెట్టావా?' అని అడిగింది. నా మనసు కరిగిపోయింది. వెంటనే వెళ్లి పాపకు వండిన అన్నం, కూరలు ఒక పళ్ళెం లో సర్ది తెచ్చి ఇచ్చాను. మళ్ళీ మామూలే... తినలేను, తినిపించమంది. నడి రోడ్డు ప్రక్కన, క్రింద కూర్చుని, నా చేత్తో కలిపి తినిపించాను. మధ్య మధ్య నీళ్ళు పట్టాను. ఆమె తృప్తిగా తిని, త్రాగి, నా చేతిని తన చేతిలోకి తీసుకుని, 'ఏ తల్లి కన్న బిడ్డవో, నువ్వు మా అమ్మవు... మా అమ్మ తర్వాత ఇంత ఆప్యాయంగా నాకు ఎవ్వరూ తినిపించలేదు...' అంటూ కన్నీళ్ళు పెట్టుకుంది. రాత్రి చూస్తే, ఆమె అక్కడ కనిపించలేదు.

రెండు రోజుల తర్వాత వేరే రోడ్డు మీద వెళ్తుంటే, జనం ఓ చోట గుమికూడి ఉన్నారు. నెమ్మదిగా వెళ్తూ చూస్తే, ఆమే ! చనిపోయి ఉంది. ఆలోచిస్తే ఆమె ఎవరో... నేను ఎవరో... ఆమెకి నాకు ఎన్ని మెతుకులు రుణమో ... ఒక మనిషిగా ఆమెకు చెయ్యగలిగిన సాయం చేసాను అంతే !

ఇప్పటికీ ఏ చిన్న అవకాశం దొరికినా ఏదో విధంగా ఇతరులకు దానం చేస్తూనే ఉంటాను. నేను చారిటీ లను నమ్మను. పేద పిల్లలు కనిపిస్తే, వెంటనే ప్రక్కనే ఉన్న కొట్టుకు వెళ్లి, చాక్లెట్ లు, బిస్కెట్ లు కొని ఇస్తాను. నా చేత్తో వండి, పులిహోర పొట్లాలు పంచుతాను. బట్టలు, కంబళ్ళు, ఏవైనా స్వయంగా నా చేత్తో ఇచ్చి, వారి కళ్ళల్లో ఆనందాన్ని చూస్తాను. అప్పుడు నాకు కలిగే తృప్తి బహుసా ఏ కొటీశ్వరుడికి కూడా కలగదేమో !

ఫేస్ బుక్ అద్దాల మేడలో కబుర్లే కాదు. బయట ప్రపంచం లోని దుఃఖాన్ని చూడాలి. వీలున్నంత ఎదుటివారికి సాయపడాలి. దానం/సాయం చేసే అవకాశాలు మనల్ని వెతుక్కుంటూ రావు. మనమే వాటి వద్దకు వెళ్ళాలి. మనం చేతిలో ఉన్నది ఇస్తూ పొతే, భగవంతుడు మన దోసిలి మళ్ళీ నింపుతూ ఉంటాడట. గురువుగారు చెప్తారు... ఇంకా, గులాబీలు పంచే చేతులనే పరిమళం అంటి ఉంటుందని చెప్తారు. నాకా నవ్వులు కావాలి, ఒక్క క్షణమైనా ఒక్క పెదవిపై చిరునవ్వు కావాలి. మరి మీకో !

                                      



"అచ్చంగా తెలుగు " వసుధైక కుటుంబకం

"అచ్చంగా తెలుగు " వసుధైక కుటుంబకం 
("అచ్చంగా తెలుగు "ఫేస్ బుక్ బృందంపై పలువురి అభిప్రాయాలు...)

Gita Kuruganti12:23am Feb 23
వెలుగు పూలు వెలుగులని
విరజింమ్మే రోజు
అంతర్జాల మాస పత్రిక
ఆవిర్భవించే రోజు
కవితా సుమాలు పద్య రత్నాలు
మదిని మురిపించే రోజు
ముత్యాల ముగ్గులు బొమ్మలు
మనని పలకరించే రోజు
భావరాజు పద్మిని గారి
కృషి ఫలించిన రోజు
సంగీత సాహిత్య సౌరభాలు
వికసించే రోజు
అచ్చం గా మిత్రులు
అందరూ కలిసే రోజు
తెలుగింటి విందు
ఆరగించే రోజు
భావరాజు పద్మిని గారి
ఆకాంక్ష నెరవెరే రోజు !!!

ఈ రోజే ఈ రోజే ఈరోజే
ఫిబ్రవరి 23 ,2014......
కదలి రండి మిత్రులారా
సభ ను జయప్రదం చేయండి!!!

ధన్యవాదములు ......గీత కురుగంటి


అచ్చంగా తెలుగు - వసుధైక కుటుంబం - వాసుదేవ రావు కొండూరు 

చాలా మందికి ఫేస్ బుక్ అనేది కేవలం ఒక కాలక్షేపమని, ఆకతాయిలకి ఆటవిడుపని, మరొకరు మరొకవిధంగా, ఉంకొకరు ఉంకోవిధంగా కాసేపు వాడుకుని మర్చిపోతారేమో గాని, ఒక బృందం ఒక కుటుంబంగా అరమరికలు, హెచ్చుతగ్గులు, ఈర్ష్యాద్వేషాలు, పొరపచ్చాలు, అభిప్రాయబేధాలు మచ్చుకైనా లేకుండా అభిమానం, ప్రేమ, ఆప్యాయత లతో పాటు, సంగీతం, సాహిత్యం, హాస్యం, చిత్రలేఖనం, ఆధ్యాత్మికం, సంస్కృతిని పంచుకుంటూ, వండుకుంటూ, వండుకున్నది అందరూ వడ్డించుకుంటూ, ఉమ్మడి కుటుంబాలు కనుమరుగవుతున్న ఈ రోజుల్లో, ఒక తాతయ్యని, ఒక పెదనాన్నని, ఒక బామ్మని, ఒక అమ్మ్మమ్మని, ఒక పెద్దమ్మని, ఒక బాబాయిని, ఒక పిన్నిని, ఒక చెల్లిని, ఒక అక్కని, ఒక బావని, ఒక మనవడిని, ఒక మనవరాలిని ఇలా అందరూ బంధువులే తప్ప ఒక్క మిత్రుడు కూడా లేని ఈ అచ్చంగా తెలుగు ఆ లోటు తీరుస్తున్నది. ఈ బృందంలోని ప్రతిసభ్యుడు ఒకరికొకరు బంధువే గాని మితృడనటం తగదేమో! నిజంగా, ఎంత అదృష్టవంతులమండి. ఇంత మంచి కుటుంబాన్ని అందించిన భావరాజు పద్మిని గారికి మనఃపూర్వక అభినందనలు, హృదయపూర్వక ఆశీర్వచనములు. గుండె నిండిపోయి మాటలు వెదుక్కోవలసి వస్తున్నది. ధన్యోస్మి.

Bharthi Kata9:28pm Mar 12
చెన్నై లో వుంటూ తెలుగు మాట్లాడటం తప్ప, చదవడం రాయడం అన్న అవసరం లేకుండా పోయింది.ఇలా అచ్చ oగా తెలుగు లో ఉంటూ అన్ని చదవడం వల్ల ,పిల్లలకి తెలుగు రాక పోయిన కనీసం నేను తెలుగు మర్చిపోను అన్న నమ్మకం నాకు కలిగింది.థాంక్స్ 2 padhimini గారు.మా మనసులో మాటని మీ మాటగా చెప్పినoదుకు రావుగారికి థాంక్స్.

Ramamurthy Rv9:16pm Mar 12
మీతో మనస్పూర్తిగా ఎకివభిస్తున్నాను వాసుదేవరావు గారు... ఎంతో దూరంలో వున్నా రోజు అచ్చంగా తెలుగు లోని టపాలతో మీ అందరి మద్య అక్కడే ఉన్నట్టుగా ఉంది. అందరికి ధన్యవాదాలు

Pavani Srinivas9:09pm Mar 12
చాలా బాగా చెప్పారండి.ఎన్నో రోజులుగా నా మనసులో ఉన్న భావన ఇది.ఎందుకో పంచుకోలేకపోయాను అనుకునేదాన్ని.కాని అక్షర రూపం లో మీరు చెప్పిన విధానం చాలా అద్బుతం గా ఉంది.నాకు కూడా ఎన్నో కోత్హ విషయాలు తెలిశాయి.ఇంతకు ముందు కాలక్షేపం కోసమో,లేదంటే స్నేహితుల విషయాలను తెలుసుకునేందుకు చాలా మంది ఉపయోగించేవారు,కానీ ఇప్పుడు మనకు ఇవాళ ఏమి కొత్త విషయం తెలియబోతుందో అనే ఆత్రుత తో నేను ఎదురుచూస్తూ ఉంటాను.కొత్త పరిచయాలు,వారి విజ్ఞాన అనుభవాలు ఎన్నో విషయాలు తెలుసుకోగాలుగుతున్నాము మనం ఈ అచ్చంగా తెలుగు ద్వారా.నా స్నేహితులు ,బంధువులు చాలా మంది నన్ను చూసి ఈ గ్రూప్ లో జాయిన్ అయ్యారు.మీరన్నట్లు మనది వసుదైక కుటుంబం.అందరం ఒక్కటై ముందుకు సాగాలని ఆకాంక్షిస్తూ పద్మిని గారికి ధన్యవాదాలతో మరియు మీ అందరికి శుభాభినందనల తో మీ పావని శ్రీనివాస్

Naresh Kandula11:04pm Mar 12
"ఈ బృందంలోని ప్రతిసభ్యుడు ఒకరికొకరు బంధువే గాని మితృడనటం తగదేమో! నిజంగా, ఎంత అదృష్టవంతులమండి."

Kalyani Gauri Kasibhatla5:53am Mar 13
కొండూరువారు... సత్యం,,ప్రవచించారు..చాల ఆత్మీయత.. అనుబంధాలను అచ్చంగా పూయిస్తున్నది మన ఈ అచ్చంగా తెలుగు.. అన్నివయసులవారూ..ఆత్మీయం గా కలసిపోతూచిక్కటి..తెలుగు బంధాన్ని మరింతగా..పెనవేసుకు పోతున్నారు.. సుఖాన్ని,దుఖాన్ని సమానంగా పంచుకుంటూ...ఆనందంగా సాగిపోతున్న..ఈ బృంద మిత్రులందరకు..మనఃపూర్వక..అభిననందనలు......

Ravi Thadicherla6:28am Mar 13
సాహితీ సంప్రదాయాల్ని కాకుండా ఆత్మీయ అనురాగాలను పంచుకున్న అచ్చంగా తెలుగుకు ధన్యవాదములు.
ఈ రోజు రెట్టింపు ఆనందం.

Gita Kuruganti8:37am Mar 13
మన మనసు లోని భావాలను చక్కగా నిర్వచించారు వాసు దేవరావు గారు..
ఇప్పుడు అచ్చంగా తెలుగు వారందరూ మన బంధువులు ...మన అందరిదీ వసుధైక కుటుంబం ...
ఎన్నో విషయాలు తెలుసు కుంటున్నాం.
తెలియనివి అడిగి తెలుసు కుంటున్నాం
అసలు నాకైతే ఒకే ఇంట్లో ఉండి అందరం మాట్లాడుకుంటున్నట్లు ఉంటోంది!

                          





Gautham Kashyap
12:23am May 19
భావ'రాజ' పద్మిని చెల్లీ...!.
**************************
ఇన్నాళ్ళూ ఈ వూళ్ళోనే వుంటూ
అందరి చేతా సాహిత్య పదార్చన చేయిస్తూ...
నిత్య సారస్వతార్చన చేస్తున్న భావరాజ పద్మినీ చెల్లీ..
నీ పేరులోనే సరస్వతీ పీఠం వుంది తల్లీ..!!
ఏదో బాధ ....ఏదో వెలితి ...!!
మా గుండెల్లో..!!
ఎన్నో ధార్మిక ఆలోచనలుu చేస్తున్న..
మీరిరువురూ వూరు వదిలి వెళుతున్నారని...!!.
స్వచ్చమైన మనసు, నిర్మలమైన ఆలోచనలున్న..
ఇంత మంచి దంపతులు,
ఎంత దూరం వెళ్ళిపోతున్నారూ..!
మా భాగ్యనగరానికి మీ భాగ్యం తగ్గి
ఆ భాగ్యం ఇక చండీఘడ్ కి పట్టుకుంటోంది...!!
ఈ కారణం వెనుక ఏ లోకోత్తర కారణం ఉందో..!!!
ఏది ఏమైనా ఈ దంపతులకు
నిత్యం సంతోషం కలగాలి.!!
నిరాడంబరమైన ఈ జంట ఇంట
లక్ష్మి నడయాడాలి..!!!
వేనోళ్ళ నిన్ను లోకం కొనియాడాలి..!!!
నిత్యం సకల శుభాలతో
సర్వ సౌభాగ్యాలతో నీ ఇల్లు నిలవాలి
నీ పేరు వెలగాలి..!..
నీకు శుభం కలగాలి తల్లీ.!.
నీకు శుభం కలగాలి నీకు శుభం కలగాలి !! - గౌతమ్ కశ్యప్
*************************************************************

వైజాగ్ విశేషాలు

వైజాగ్ విశేషాలు 
- రచన : భావరాజు పద్మిని 

మీరు అలా వైజాగ్ వెళ్లి వచ్చారు కదా, ఆ విశేషాలు కొన్ని చెప్పరూ... అని అడిగారు అవధానుల రామారావు గారు. సరే, ఆ చెప్పేది కాస్త సృజనతో కలిపి సరదాగా చెప్తాను. ఒక పల్లెటూరి అతనికి ఉన్నట్టుండి డబ్బు చేసింది. ఈ డబ్బు చెయ్యడం అనేది చాలా భయంకర వ్యాధి. తనకు యెంత డబ్బు చేసిందో, తను యెంత గొప్ప వాడిని అయ్యానో, అవతలి వాళ్లకి చూపించుకుంటే తప్ప వీళ్ళకి తృప్తి ఉండదు. ఆ ముచ్చట తీర్చుకోవాలని అతను తన చిన్ననాటి స్నేహితులను, విహార యాత్ర పేరుతొ పెద్ద 5 స్టార్ హోటల్ కు తీసుకెళ్ళాడు. అలా అతని వెంట మొట్టమొదటి సారిగా పెద్ద హోటల్ కు వెళ్ళిన ఒక మిత్రుడు తన భార్యకు ఇలా లేఖ వ్రాస్తున్నాడు..

లచ్చుమి,

నేను బాగుండాను, నువ్వు బాగుండావా. మనింట్లో ఫోన్ లేదు గందా .రూపాయి డబ్బా కాడ నువ్వు అంత సేపు నిల్చోలేవని ఈ చీటీ రాస్తాఉండాను. నారిగాడు ఇప్పుడు మారిపోయాడే! 'నార్...' అని పిలుస్తా ఉండారు. ఈ నారలు, పీచులు డబ్బుతో వస్తాయేమో! అంతా మాయగా ఉండాదే!

గొప్పోళ్ళు , ఉండోల్లు అంటారు గానోసే, నాకైతే, యెంత చెట్టుకు అంత గాలని అనిపిస్తా ఉంది. ఇక్కడ నాకో పెట్టె గది ఇచ్చారు... మనూళ్ళో మిరపకాయలు ఉంచే పెద్ద చల్ల పెట్టె గది (కోల్డ్ స్టోరేజ్ ) గుర్తుకోచ్చినాది. డబ్బాలో వేసి మూత పెట్టినట్టు ఉంది. ఒక ఫ్యాన్ కూడా లేదు. బయట గాలి పీల్చుకునే వీలు లేదు. తానానికి బక్కెట్టు కూడా లేదు, ఏదో చిల్లుల పళ్ళెం లా ఉంది గందా, అదే తిప్పుకుని పోసుకోవాల. పాపం తానాలగాదికి గొళ్ళెం కూడా ఎట్టించలేదు. ఇంత పెద్ద వొటేలు కట్టేది మాటలా... ఇలా ఖర్సు తగ్గించుకు ఉంటారు. 

లచ్చీ, సదూకున్నోడి కంటే చాకలోడు మేలని అంటారు... అదెలాగో నా మట్టి బుర్రకి అప్పుడు ఎక్కలేదే! ఇప్పుడే తెల్సినాది. ఇక్కడ గుడ్డలు ఆరేసుకునే వీలు లేదు కందా! వాల్లకేసేస్తే ఉతికి తెస్తారంట ! డ్రాయరు ఉతికితే డెబ్భై, బనీను ఉతికితే వంద.... చూడగానే నాకు ఆ డబ్బెట్టి కొత్తవే కొనుక్కోవచ్చు కదా, అనిపించినాది. ఇక ఇలాగే చొక్కా, పంట్లాము... బట్టలుతికి చాకలోడు ఇంత సంపాయిస్తా ఉంటే, మరి చాకలోడే మేలు గందే! 

మన నారిగాడు ఊరంతా తిప్పినాడు. వొటేలు గది కిటికీ లోంచి సముద్రం కనిపిస్తా ఉంది. ఎన్ని ఆటుపోట్లు ఉన్నా, సుడిగుండాలు ఉన్నా,యెంత గంభీరంగా ఉంటాది సముద్రం. మడిసి మనసు కలత పడితే, కళ్ళు మూసుకుని, ఆ సముద్రాన్ని గుర్తుకు తెచ్చుకుంటే, గొప్ప ధైర్యం వస్తాదని అనిపించినాది. ఇక యేవో 'బొర్రా గుహలంట ' ఎల్లినాము. ఒక పెద్ద పందికొక్కు నేలలో కన్నం తవ్వేస్తే ఎలాగుంటాది ? అలాగున్నాయి ఇవి. పైనుంచి పడే నీళ్ళచుక్కలు, రాళ్ళ లో ఎన్ని రంగులో, ఆకారాలో పుట్టించాయి. గోస్తనీ నది పారడం వల్ల కొన్ని లచ్చల సంవత్సరాలుగా రాళ్ళు కరిగి ఇలా వచ్చినాయంట. ఆవు ఒకటి అడవిలో తిరుగుతూ, ఈ కంతలో పడి అరుస్తుంటే, ఇవి కనిపేట్టినారంట. భలే బాగుండాయే. దేవుడి కంటే గొప్ప కళాకారుడు ఎవరున్నారు చెప్పు. ఈ పాలి నిన్నూ తీసుకెళ్తా !

ఇక ఇక్కడ వొటేలు, తిండి ఈ గొలేంటో పెద్ద గందరగోళం అనుకో! కరువెక్కి పోయినట్టు ఇరవై ముప్ఫై రకాలు ఉంటాయి. పస లేని కూడు. ఉప్పూ కారాలు మితం. నిముసానికి ఓ పాలి ఒక మడిసి వచ్చి, 'తిండి నచ్చిందా?' అనడుగుతాడు. 'ఏం చెప్పేది ? తిండంటే ఎలాగుండాల? నోట్లో పెట్టుకోగానే ఆ రుచి నరాల్లో పాకి, హబ్బా, అదిరిపోయింది అని నోరు దానంతట అదే అనాల. అంతేగాని ఈ అడుక్కోడాలు ఏందో ! ఇక్కడికొచ్చిన తెల్లోళ్ళని చుస్తే నవ్వొస్తాది. అన్ని రకాలు ఉన్నా, రొట్టె ముక్కలే పీక్కు తింటారు.అంత తిన్నాకా అరగాలి గందా ! అందుకే వ్యాయామం చెయ్యడానికి ఇందులోనే 'జిం ' ఉండాది. మరి రాత్రైతే అంతా తాగుడే, వాగుడే ! ఆ తాగినోళ్ళ కోసం గొంతు చించుకు పాడతా ఉండారు. వాళ్ళ బుర్రకి ఏమి ఎక్కుతాది? డబ్బుంటే, ఎన్ని పన్లేని పన్లు చెయ్యాలో చూసినావా ? తినాల, అరగాల... తిరగాల, చెడ్డ అలవాట్లు మరగాల... తర్వాత ఆసుపత్రుల్లో పడి మగ్గాల. అంతా వింత లోకం !

మన ఇల్లు, పగలు పొలం పని చేసి వచ్చి అలసి మడత మంచం వాలిస్తే, చల్లగా సేద తీర్చే పైరగాలి , ప్రేమగా నువ్వు అందించే బువ్వ... పుడమి తల్లితో, పంచభూతాలతో బంధం. నాకదే బాగుందే ! ప్రకృతికి దూరమైన కొద్దీ మనిషి పశువుకు దగ్గర అవుతున్నాడని అనిపిస్తా ఉంది. నాకిక్కడ అసలు నచ్చలేదు. అంతా ఏదో తెలియని కృత్రిమత. ఇక తొందర్లోనే బయల్దేరి వెనక్కి వస్తాను... నాకోసం సూస్తా ఉండు.

శీనయ్య.



కదంబం 2

(అచ్చంగా తెలుగు ఫేస్ బుక్ బృందంలో పలువురు అందించిన మంచి పోస్ట్ లు ....)

V V S Sharma
దేహో దేవాలయ ప్రోక్తో జీవోదేవ స్సనాతనః 
త్యజేదజ్ఞాన నిర్మాల్యం సోహంభావేన పూజయేత్ 

మానవ దేహము, నివాసగృహము, దేవాలయము, బ్రహ్మాండ నిర్మాణము - ఛందస్సులు, వేదములలోని విరాట్ పురుషుడు, వాస్తుపురుషుడు, శరీరములోని అంగుష్ఠమాత్ర పురుషుడు - ఇవన్నీ ఒకే తత్త్వము ఆధారముగా సంకల్పించి సృష్టింపబడినవి. వాస్తు, జ్యోతిషము,నిగమాగమములు, చందస్సు, వేద మంత్రములు వీని అంతర్గత సంబంధమే సనాతన ధర్మము.

________________________________________________________________________


శివ ప్రసాద్ పెనుముచు (చిన్న కధ)

ఒక యువకుడు రెండు ఎత్తైన కొండల మధ్య ఫీట్స్ చేస్తున్నాడు..
ఒక కొండ మీద నుండి ఇంకొక కొండ పైకి ఒక ఇనుప తీగ కట్టి ప్రజలందరూ చూస్తుండగా ఒక కర్ర ఆధారంగా తీగపై ఒక వైపు నుండి మరొక వైపుకు నడిచాడు. అక్కడున్న ప్రజలందరూ చప్పట్లు కొట్టారు ... తర్వాత ఒక చక్రం ఉండే తోపుడు బండి తీస్కుని ఒక వైపు నుండి మరొక వైపుకి నడిచాడు ..చూస్తున్న వారందరూ మరల కరతాళ ద్వనులు చేసారు..
తర్వతా ఆ యువకునితో కొంత మంది ఇలా అంటారు .. ప్రాణం లేని బండి, కర్ర తో నడవడం కాదు ఒక మనిషిని ఆ బండి లో కూర్చో పెట్టుకుని తీగపై నడువు అప్పుడు నీవు గోప్పవాడివని నమ్ముతాం అంటారు ..
అప్పుడా యువకుడు "ఎవరైనా వచ్చి ఈ బండి లో కూర్చుంటే అలాగే చేస్తాను" ఎవరైనా ఉన్నారా అని అడుగుతాడు ..అప్పుడు ఎవరు ముందుకు రారు..
కాసేపటి తర్వాత ఒక ముసలి అతను వచ్చి బండి లో కూర్చుంటాడు ... అక్కడున్న వారు ఎం తాత బ్రతుకు మీద ఆశ చచ్చి పోయిందా? ఈ విధంగా ఫేమస్ అవ్వాలనుకుంటున్నావా, ఇంటిదగ్గర చెప్పి వచ్చావ" అని ఎగతాళి చేస్తారు ..
ఆ యువకుడు బండిలో ముసలి వ్యక్తిని కూర్చో పెట్టుకుని ఇవతలి నుండి అవతలికి సునాయాసంగా నడుస్తాడు.
అక్కడున్న కొందరు వచ్చి "ఎం తాత ఏ నమ్మకం తోటి ఆ అబ్బాయి మాటలు విని ఇంత పనికి తెగించావు " అని అడుగుతారు..??
ఎందుకంటే వాడు నా కొడుకు " అని అతను సమాధానం చెప్తాడు ..
ఫ్రెండ్స్.. 
ఈ ప్రపంచం మిమ్మల్ని నమ్మిన నమ్మకపోయినా మీ తల్లితండ్రులు మిమ్మల్ని నమ్ముతారు.. మీ ఔన్నత్యం కోసం ఎంత త్యాగానికైనా సిద్ద పడతారు....అవమానాలని కూడా భరిస్తారు...మీ తల్లి తండ్రులు మీమీద పెట్టుకున్న నమ్మకాన్ని వమ్ముచేయకండి. తల్లితండ్రులని గౌరవించండి.. 

___________________________________________________________________________________________

సేకరణ :కొల్లూరు విజయా శర్మ 

ప్రేమని గురించి ఉత్ప్రేక్షలు పేనుతుంటే 
గుండెని కోకిల తన్నుకుపోయింది.
గజల్ గురించి రాద్దామని కూర్చుంటే
రాత్రి కవిత్వం లో తడిసిపోయింది.

గుంటూరు శేషేంద్ర శర్మ.

__________________________________________________________________________

దేవులపల్లి కృష్ణశాస్త్రి 'అన్వేషణం నుండి...

ఎలదేటి చిరుపాట సెలయేటి కెరటాల
బడిపోవు విరికన్నె వలపువోలె
తీయని మల్లెపూదేనె సోనల పైని
తూగాడు తలిరాకు దోనెవోలె
తొలిప్రొద్దు తెమ్మెర త్రోవలో పయనమై
పరువెత్తు కోయిల పాటవోలె
వెల్లువలై పారు వెలది వెన్నెలలోన
మునిగిపోయిన మబ్బుతునుకవోలె

చిరుత తొలకరివానగా చిన్ని సొనగ
పొంగి పొరలెడు కాల్వగా నింగి కెగయు
కడలిగా పిల్లగ్రోవిని వెడలు వింత
తీయదనముల లీనమైపోయె నెడద.

_________________________________________________________________________

ఈ సుభాషితం బాగుంది... చూడండి...
గుణవంతమైన వస్తువు సాంగత్యం వల్ల, అల్ప వస్తువుకు కూడా గౌరవం ప్రాప్తిస్తుంది. పువ్వులతో పొత్తు కుదరడం వల్లనే కదా, నిస్సారమైన దారాన్ని తలపై ధరిస్తున్నారు!

_________________________________________________________________________

'ముక్త పదగ్రస్తం ' అనే అలంకారాన్ని గురించి విన్నారా?
ముందు విడిచిన పదాన్నే (ముక్త పదం) తిరిగి గ్రహిస్తూ పోవడం దీని లక్షణం.
( ఒక వాక్యం ఏ పదం తో అంతం అవుతుందో అదే పదం రెండో వాక్యానికి మొదటి పదం కావటం ముక్త పద గ్రస్త అలంకారం )

ఉదా. 
సుదతీ నూతన మదనా !
మదనాగ తురంగ పూర్ణ మణి మయ సదనా !
సదనా మయ గజరదనా !
రదనాగేంద్ర నిభకీర్తి రస నరసింహా !

ముక్త పదగ్రస్తం అనే అలంకారం ఆధారం గా తెలుగు సినిమా సాహిత్యం లో ప్రయోగించబడిన సినీ పాట 'సుమంగళి ' చిత్రంలో కనులు కనులతో కలబడితే... ఇంకా మీకు ఏవైనా పద్యాలు కాని, పాటలు కాని తెలిస్తే చెప్పరూ!

జవాబులు :
గోదారి గట్టుంది... గట్టుమీన చెట్టుంది... అనే పాట - దుర్గ చెరువు 

Sridhar Hanumanthkar1:21pm Mar 11
కలనా, వ్రాయం గలనా
గలనాగము దాల్చువాని గాంచంగలిగే,
కలిగే ప్రతి మృదుచలనము
చలనము నొసగెడు హరుడిని చకితుని జేయన్.

తలచీ వ్రాయం దలచీ
దల చీరము దాల్చువాని *ధారణ దలచీ
దలచీకటి పో దలచీ
దలచీరము వంటివైన తండపు పదముల్.

Courtesy: https://groups.yahoo.com/neo/groups/telusa/conversations/topics/2380?xm=1m%3Dptidx%3D1
by: Madhava K Turumella

Naresh Kandula1:32pm Mar 11
ముక్తపదగ్రస్త్యము తో వున్న ఒక సూపర్హిట్ సినిమా పాట..

మాటరాని మౌనమిదీ
మౌనవీణగానమిదీ
గానమిదీ నీ ధ్యానమిదీ
ధ్యానములో నా ప్రాణమిదీ
ప్రాణమైన మూగగుండె రాగమిదీ...

అందరాని కొమ్మ ఇదీ
కొమ్మ చాటు అందమిదీ..

https://www.youtube.com/watch?v=gskC2HBfRuA

Krishna Mohan Mocherla1:39pm Mar 11
రేపంటి రూపం కంటి పూవంటి తూపులవంటి నీ కంటి చూపుల వెంట నా పరుగంటి - ఘంటసాల, పి.సుశీల - రచన: ఆత్రేయ

Sridhar Hanumanthkar4:44pm Mar 11
లేమా దనుజుల గెలవగ లేమా అని ఇంకో పద్యం చదివినట్లు గుర్తు.

Naga Babu5:36pm Mar 11
కనులు కనులతో కలబడితే ఆ తగువుకు ఫలమేమి కలలే
కనులు కనులతో కలబడితే ఆ తగువుకు ఫలమేమి కలలే...
నా కలలో నీవే కనబడితే ఆ చొరవకు ఫలమేమి మరులే...
మరులు మనసులో స్థిరపడితే ఆపై జరిగేదేమి మనువూ...ఊ..ఊ
మనువై ఇద్దరు ఒకటైతే ఆ మనుగడ పేరేమి సంసారం
కనులు కనులతో కలబడితే ఆ తగువుకు ఫలమేమి కలలే...

అల్లరి ఏదో చేసితినీ చల్లగ ఎదనే దోచితివీ
అల్లరి ఏదో చేసితినీ చల్లగ ఎదనే దోచితివీ
ఏమీ లేని పేదననీ నాపై మోపకు నేరాన్ని
ఏమీ లేని పేదననీ నాపై మోపకు నేరాన్ని
లేదు ప్రేమకు పేదరికం నే కోరను నిన్నూ ఇల్లరికం
లేదు ప్రేమకు పేదరికం నే కోరను నిన్నూ ఇల్లరికం
నింగీ నేలకు కడు దూరం మన ఇద్దరి కలయిక విడ్డూరం

కనులు కనులతో కలబడితే ఆ తగువుకు ఫలమేమి కలలే...
నా కలలో నీవే కనబడితే ఆ చొరవకు ఫలమేమి మరులే...
మరులు మనసులో స్థిరపడితే ఆపై జరిగేదేమి మనువూ...ఊ..ఊ
మనువై ఇద్దరు ఒకటైతే ఆ మనుగడ పేరేమి సంసారం
కనులు కనులతో కలబడితే ఆ తగువుకు ఫలమేమి కలలే...

Sivarama Krishna Rao Vankayala6:24pm Mar 11
ఒక సారి ఒక సభలో విశ్వనాథ వారూ, తెన్నేటి విశ్వనాథం గారూ ప్రక్క ప్రక్కనే కూర్చున్నారట. అప్పుడు విశ్వనాథ వారు తెన్నేటి వారితో, 'మనిద్దరి పేర్లూ కలిపితే ఒక మంచి ముక్తపదగ్రస్తం అవుతుతుంది కదూ' అన్నారుట!