మిధునం - మేధో మధనం

మిధునం - మేధో మధనం 

-------------------------------

 భావరాజు పద్మిని 

ఎప్పుడైనా 60 ల వయసు దాటిన మిధునాన్ని కలిసారా ? కలిస్తే వారి చర్చ ఇలా ఉంటుంది. వాళ్ళను కలవడానికి ఒక చుట్టాలామె వెళ్తుంది.

"ఏమే, ఎప్పుడొచ్చావ్ ?"
"3 రోజులు అయ్యిందండి..."
"మీ ఆయన, పిల్లలు అంతా బాగున్నారా ?"
"బాగున్నామండి, మీరు బాగున్నారా ?"
"ఆ, బాగున్నాం, ఇది నీ చిన్న కూతురా ? మీ పెద్దమ్మాయికి ఎన్నేళ్ళు ?"
"అవునండి, 13 డేళ్ళు ..."
"హా, నీ పెళ్లి ఎప్పుడయ్యిందే ? 98 లోనా ?"
"కాదండి, 2000 సం. లో "
"అవున్లే, నీ తాంబూలాలప్పుడు మేము వచ్చాం. కాని, మా చెల్లెలి మనవారాలి పెళ్లి కదూ, అందుకే నీ పెళ్ళికి రాలేకపోయాం."
వెంటనే... మేధో మధనం మొదలు...
"ఏవిటీ, రత్న పెళ్లి అయ్యింది 98 లో ఈ పిల్ల పెళ్ళికి, మన కృష్ణుడు పుట్టాడు కదూ, అందుకే రాలేదు."
"ఏడిశావ్ , కృష్ణుడు 2001 లో కదూ  పుట్టాడు... ఏడాది ముందే అంటావేంటి ?"
"ఇదమ్మాయ్ ఈయన వరస, ఈ మధ్య ఎడ్డెం అంటే తెడ్డెం అంటారు. మనవడు పుట్టిన ఏడాది కూడా మర్చిపోయారు."
"చాల్లే సంబడం, ఈవిడకి మతిమరుపు పెరిగిందే అమ్మాయ్..."
పెదావిడ కాసేపు మౌనం, చూపులతో యుద్ధం...

"అన్నట్టు, మీ అమ్మగారి పుట్టింటి పేరు ఏవిటే..."
"ఆదూరి అండి..."
"ఓ ఆదూరి సుబ్బారాయుడు నీకు తెల్సుటే..."
నేను చెప్పే లోపే... పెద్దావిడ...
"ఏవిటి, సుబ్బారాయుడు ఇంటి పేరు ఆదూరి కాదు, జాస్తి..."
"ఏవిటే నువ్ మాట్టాడేది, నీ పీత బుర్రకు ఇంటి పేర్లు కూడా గుర్తా ?"
"ఏవిటి, నాది పీత బుర్ర అంటారా ? మీదే నత్త బుర్ర ?"
"అయితే నీది చీమ బుర్ర ..."
" అంతే లెండి, తిమిరి ఇసుమున తైలంబు అని... ఊరికే అన్నారా ?"
"నన్ను మూర్ఖుడు అంటావే ! పోన్లే, నువ్వే నాయకురాలు నాగమ్మవి. ఇదే పిల్లా వరస..."
ఈ సారి పెద్దాయన చూపుల యుద్ధం...

"అన్నట్టు, మీ అమ్మగారి స్వస్థలం ఎక్కడే ?"
"చేబ్రోలు అండి..."
"ఏదీ, మన గుంటూరు జిల్లా చేబ్రోలే !"
"కాదండి, పశ్చిమ గోదావరి జిల్లా ..."
" అలాగా, అక్కడ మట్టిగుంట సత్యవతి అనీ, మీకు తెల్సా !"
నేను భయంగా పెద్దావిడ వంక చూస్తూ... "లేదండి..." అంటుండగా... పెద్దాయన పెద్దావిడ వంక చూసారు.
" ఆ పెట్టండి పెట్టండి... అనకాపల్లి వాళ్ళని తీసుకెళ్ళి చేబ్రోలు లో పెట్టండి, ఒకళ్ళ ఇంటి పేరు ఇంకొకళ్ళకి తగిలించండి, ఏళ్ళు మర్చిపోయి... మీకు ఇష్టమొచ్చినప్పుడు పెళ్ళిళ్ళు, బారసాల లు చేసెయ్యండి... నాకెందుకు వచ్చిన గొడవ బాబూ !"
పకపకా నవ్వడం నా వంతు, పెద్దాయన వంతు అయ్యింది... ఎంతైనా, నిండు జీవితం పండించుకున్న దంపతుల గిల్లికజ్జాలు కూడా మధురమే కదా ! మీకూ ఇటువంటి సంఘటనలే ఎదురయ్యి ఉంటాయ్ కదా !